(បាត់ដំបង) យ៉ាងហោចណាស់មនុស្សប្រុសស្រី០៣នាក់បានស្លាប់នៅហ្នឹងកន្លែង និង០៧អង្គនាក់ផ្សេងទៀតរងរបួសធ្ងន់ស្រាលនៅក្នុងហេតុការណ៍គ្រោះថ្នាក់ចរាចរណ៍ដ៏រន្ធត់មួយដែលកើតឡើងរវាងរថយន្ត០១គ្រឿងជ្រុលបុកគោយន្តកន្ត្រៃ និងបន្តទៅបុកម៉ូតូ០២គ្រឿងនៅល្ងាចថ្ងៃទី០៣.ខែវិច្ឆិកា ឆ្ឆ្នាំ២០២៤ នៅតាមបណ្តោយផ្លូវជាតិលេខ៥ ខាងមុខវិទ្យាល័យសង្កែ ស្ថិតក្នុងភូមិអូសទូក ឃុំកំពង់ព្រៀង ស្រុកសង្កែ ខេត្តបាត់ដំបង។
ប្រភពពីកន្លែងកើតហេតុបានប្រាប់ថា នៅមុនពេលកើតហេតុគេឃើញម៉ូតូ០២គ្រឿង ០១គ្រឿងបើកបរដោយបុរសម្នាក់ និង០១គ្រឿងទៀតបើកបរជិះ០២នាក់ម្តាយនិងកូនស្រី ដែលពាក់ផ្លាកលេខ បាត់ដំបង 1AP-3260 និងផ្លាកលេខ បាត់ដំបង 1AF-6911 បើកបរក្នុងទិសដៅពីត្បូងទៅជើង បន្ទាប់មកក៏មានគោយន្តកន្ត្រៃ០១គ្រឿងបើកឆ្លងផ្លូវពីលិចទៅកើត ភ្លាមនោះក៏មានរថយន្តស៊ីណា ពណ៌ស០១គ្រឿង ពាក់ផ្លាកលេខ ភ្នំពេញ 2BT-3122 ដឹកព្រះសង្ឃ០៣អង្គ និងកូនសិស្ស០៣នាក់ បើកបរក្នុងល្បឿនយ៉ាងលឿនទិសដៅពីត្បូងទៅជើង បានជ្រុលចង្កូតទៅបុកគោយន្តពេញទំហឹងរួចបន្តទៅបុកម៉ូតូ០២គ្រឿងខាងលើបណ្តាលអោយស្លាប់ទាំង០៣នាក់ ចំណែករថយន្តក្រឡាប់ចូលប្រឡាយរងរបួសធ្ងន់ស្រាល០៧អង្គនាក់តែម្តង។
ក្រោយពេលកើតហេតុ សមត្ថកិច្ចជំនាញបានចុះទៅដល់ដឹកបញ្ជូនជនរងគ្រោះទៅសង្គ្រោះព្យាបាលនៅមន្ទីរពេទ្យ សាកសពត្រូវបានប្រគល់អោយសាច់ញាតិយករៀបចំធ្វើបុណ្យតាមប្រពៃណី ចំណែកមធ្យោបាយទាំងបួនត្រូវបានវាស់វែងធ្វើកំណត់ហេតុយកទៅរក្សាទុកនៅការិយាល័យនគរបាលចរាចរណ៍ផ្លូវគោកដើម្បីរងចាំដោះស្រាយតាមផ្លូវច្បាប់៕
