(ប៉ៃលិន) មេទាហានម្នាក់សង្ស័យស្រវឹងស្រាបើកបររថយន្តក្នុងល្បឿនលឿនទៅបុកម៉ូតូពីក្រោយបណ្តាលអោយស្លាប់បុរសម្នាក់នៅនិងកន្លែងគួរអោយអាណោចអាធ័មនៅរសៀលថ្ងៃទី០៣-ខែធ្នូ ២០២៤ លើតាមបណ្តោយផ្លូវជាតិលេខ៥៧ ចន្លោះបង្គោលគីឡូម៉ែត្រលេខ៨០-៨១ ស្ថិតក្នុងភូមិដីក្រហម សង្កាត់អូរតាវ៉ៅ ក្រុង/ខេត្តប៉ៃលិន។
ប្រភពពីសមត្ថកិច្ចបានអោយដឹងថា ភាគីរថយន្តឈ្មោះ ប៉ាក ប៊ុននឿន អាយុ ៥៧ឆ្នាំ មានមុខរបរយោធា មានតួនាទីមេបញ្ជាការរងតំបន់ប្រតិបត្តិការសឹងរងខេត្តប៉ៃលិនមានទីលំនៅភូមិបរតាំងស៊ូ សង្កាត់បយ៉ាខា ក្រុង/ខេត្តប៉ៃលិន បើកបររថយន្តម៉ាក ISUZU ពណ៌ទឹកប្រាក់ ពាក់ផ្លាកលេខ ខេមរៈភូមិន្ទ07 2-1321។
រីឯភាគីម៉ូតូឈ្មោះ ជ្រូក ផន ភេទប្រុស អាយុប្រហែល ៦៥ ឆ្នាំ មុខរបរកសិករ រស់នៅភូមិបរឌិននៀវ សង្កាត់/ក្រុង/ខេត្តប៉ៃលិន (ស្លាប់នៅហ្នឹងកន្លែងកើតហេតុ) បើកបរម៉ូតូម៉ាក Honda Dream ពណ៌ខ្មៅ ផ្លាកលេខ បាត់ដំបង 1D-7375។
ប្រភពបានបញ្ជាក់ថា មូលហេតុ៖ បណ្ដាលមកពីកត្តាមនុស្ស (ភាគីរថយន្តបើកបរដោយល្បឿនលឿន និងក្នុងស្ថានភាពស្រវឹង ទៅបុកម៉ូតូពីក្រោយពេញទំហឹង)។
ក្រោយពីកើតហេតុសមត្ថកិច្ចបានចុះវាស់វែងនិងយកវត្ថុតាងមករក្សាទុកនៅការិ.នគរបាលចរាចរណ៍ផ្លូវគោក ដើម្បីរងចាំការដោះស្រាយតាមនីតិវិធី៕
