ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិម្ម រុក្ខាប្រមាញ់ និងនេសាទ បានឱ្យដឹងនាថ្ងៃទី១២ ខែមករា ឆ្នាំ២០២៥ ដោយអំពាវឱ្យកសិករយើងងាកមកប្រើប្រាស់ពូជយុទ្ធសាស្ត្ររបស់កម្ពុជា ដែលក្រសួង ធ្លាប់បានលើកឡើងជារឿយៗក្នុងពេលកន្លងមក ហើយពិតជាគ្មានពេលណាសមស្របជាងពេលនេះទេ ក្នុងការជំរុញការដាំដុះពូជ ស្រូវក្រអូបរបស់យើងឡើយ។
ឯកឧត្តមអនុរដ្ឋលេខាធិការបានបន្តទៀតថា តើយើងនៅចាំបានថា កាលពីពេលថ្លៃស្រូវអូអឹម និងស្រូវសែនក្រអូបខុសគ្នាតែ១០០រៀលក្នុង១គីឡូក្រាម ទោះបីជាមានការខិតខំប្រឹងប្រែងផ្សព្វផ្សាយយ៉ាងណាក៏យើងពិបាកបញ្ចុះបញ្ចូលឱ្យកសិករងាកមកដាំពូជក្នុងស្រុកដែរ តែអីឡូវនេះ គម្លាតតំលៃស្រូវ អូអឹម និងស្រូវក្រអូបរបស់យើងមានរហូតដល់ទៅជិត៥០០រៀលក្នុង១គីឡូក្រាម ជឿថាកសិករយើងប្រហែលជាអាចពិចារណាបានហើយ ជាពិសេសការរួមគ្នាផលិតជាសហគមន៍ទំនើបតែម្តង។
ទន្ទឹមនឹងនេះ ឯកឧត្តមសូមឱ្យបងប្អូនកសិករថ្លឹងថ្លែងឱ្យបានច្បាស់លាស់ពីអត្ថប្រយោជន៍ និងភាពខុសគ្នា រវាងការដាំពូជបរទេសរៀងៗខ្លួន ពូជជាលក្ខណៈគ្រួសារហើយប្រឈមទៅនឹងហានិភ័យទីផ្សារខ្ពស់ និងការរួមគ្នាផលិតពូជអង្ករក្រអូបរបស់កម្ពុជាយើងជាសហគមន៍ទំនើបដោយទទួលបានការគាំពារ គាំទ្រ និងអន្តរាគមន៍ជួយពីកម្មវិធីគោលនយោបាយរបស់រដ្ឋក្នុងករណីចាំបាច់ទៀតផង៕
ក្រសួងព័ត៌មាន
